B2 – Mari Hirigoien

«Eiheralarre Hiribarnean, ama eri zuten eta… ezin finituz ari¹. Eta beilak ofreditu² zazkoten, haren pausatzeko³, Orreagako Ama Birjinari, otoi eman zezakon eriari pausia. Eta hil zen ama eta beila… egin gabe gelditu zen.
Eguerdi batez, etxekanderea gasnaren egiten ari zela, ontzitegi-ermeriak⁴ inarrosi
zitzazkon. Eta: «Jesus! Zer da hori, eta?». Gasna egiten segitu eta armairua berriz inarrosi zitzakon. Orduan, lazta jauzi zitzakon⁵.
Senarra pausa puxkaren egiten, emaztea joan zitzakon ganberarat:
– Eñaut, Eñaut! Gure ama zenarendako⁶ Orreagarat ofreditia dugun beila bat ere ez dixigu (dugu) egina, eta!
– Ba, eginen dixigu oraino.
– Ez, ez. Bietan ontzitegi-ermeriak inarrosi ziazkidatxu (zaizkit), ez dixut (dut) azieta bat ere higiturik⁷. Eta hura duxu (da) otoitz horien galdez ari⁸ dena. Denak utzi, berehala joan behar dixigu (dugu). Eta berehala jateko puxka bat prestatu zuen. Senarra beztitu⁹ eta, segidan partitu ziren beilaren egitera oinez: zazpi oren oinez, jateko puxka bat zakuan. Orreagako beila eta gero, egundaino¹⁰ geroz gehiago ez zen Hiribarnean izan arima herratuen azantzarik».

Arana, Anuntxi
Hilak gure artean.
Donostia: Elkar, 2015. 47-48. or.
(Ikasek moldatua)

1. Ezin finituz ari (izan): hilzorian izan, (fr: agonie lente et douloureuse)
2. Ofreditu: eskaini, (fr: offrir)
3. Pausa: atseden, (fr: repos)
4. Ontzitegi-ermeria: ontziak altxatzeko armairua, (fr: vaisselier)
5. Lazta jauzi: izuak hartu, (fr: être pris.e de panique)
6. Gure ama zena: (fr: notre défunte mère)
7. Higitu: mugitu
8. Galdez ari: eskatzen ari
9. Beztitu: jantzi
10. Egundaino ez: sekula ez, (fr: jamais)