B2 – Ama Euskal Herria, Xalbador

Ama Euskal herria (Xalbador)

1. Delikatua baitut egungo sujeta,
hasi aitzin egin dut zonbait gogoeta
gure arteko asko ele entzun eta,
euskaldun agertzea ez baita josteta.

2. Badakit askoz ere nukeela hobea
nehori ez agertu ene dolorea
odolaren mintzoa eduki gordea
nahiko nuke baina ezin dut ordea.

3. Ama Euskal Herriaz naiz nahigabetua,
uztera doalakotz betikotz mundua,
bere seme alabez abandonatua;
nork barka dezaguke gure bekatua?

4. Bata dela eskuina, bertzea ezkerra,
euskaldunen artean hazi dugu herra,
ahantziz, Ama, zure maitasun ederra,
horra zure semeok dautzugun eskerra.

5. Baztertu dugulakotz zure maitasuna,
desegin da betiko gure batasuna,
gu baitan aditzen da gudu oihartzuna,
hau da zuri bizia ekendu dautzuna.

6. Lehen sartu zitzauzun ezpata zorrotza
zure etxe nagusi jartzean arrotza;
halere etzitzauzun gelditu bihotza;
etxekoen eskutik duzu heriotza.

7. Zure lekua hartu duen andereak,
gurekin behar ditu pairatu bereak;
amaizunarendako ez daizke hobeak
ama ukatu duten haur dohakabeak.

8. Baditaike semeok noizbait oroitzea,
Ama, zuganik izan dugula sortzea
guhaurek bilaturik zure ehorztea,
jasan beharra dugu gaztigu dorpea.

9. Hilobi huntan noizbait norbait badabila,
zure izaitearen herrestoen bila,
lurpetik entzunen du deiadar bipila:
hemen dago ama bat bere haurrek hila!