B1 - Maitatua sobera (Ama) - Kolegioko baliabide digitalak

Overview

Maitasuna gai osoa

Testua irakurri ondoan, galderei erantzun iezaiezu.

Jules Moulier, Oxobi

Bidarrain sortu zen 1888an. Larresoroko seminarioan eta ondotik Biarnoko Nayko seminario nagusian egin zituen goi mailako ikasketak. Herriminak bultzatu omen zuen idaztera, eta euskara eta euskal kulturaren sustatzera. 1912an Hiriburuko bikario izendatua izan zen eta Jean Hiriart-Urruty laguntzen aritu zen Euskalduna aldizkarian idatziz. Beste hainbat apez euskaltzalerekin batean Gure Herria kazeta sortu zuen 1921ean eta lehen urteetan bere gain hartu omen zuen aldizkariko lan kargurik handiena. Literaturari doakionez, poesian nabarmendu zen bereziki. 1914an argitaratu Boz-oihu-deiadar nigar liburuan erakutsi zuen bere maisutasuna. Baina beste sail zenbaiteko liburuak ere bazituen: Alegiak, bertsotan idatzi fabulak, 1926an argitaratuak, Heiatik zerura (1935), Haur-elhe haurrentzat (1944), Aintzina (1944), Oxalde (1949)

Maitatua sobera nintzelarik haurra,
ez nakien nik zer zen amaren beharra;
bortu batean orai naiz bakar bakarra,
hartaz orhoit’ orduko heldu zaut nigarra.

Hegalñoak azkartzen sendituz geroztik,
baitoazi xoriak ohantze gozotik,
halaber joan ninduzun amaren altzotik…
ahantzia bainute herrian engoitik!

Bainan ama gaixoak ez nu ez ahantzi:
maiz daut Eskual Herritik igortzen goraintzi:
hautsi nion bihotza, nuenean utzi;
neretzat baizik ez da halere han bizi.

Bero daukat nik ere bihotzean garra,
Jinkoak piztu zauntan eskualdun pindarra!!
ama baitut oraino minetan indarra,
ama, gau ilhunean, argidun izarra!!!