A2 – Ezkutuko maitea

EZKUTUKO MAITEA

1. Neuk ere izan nuen ezkutuko maite bat
zazpi edo zortzi urte nituela.
Berak ez zekien ezer.
Ez nion inoiz ezer esan.
Irribarre bat zen harekin zubi bakarra.

2. Duela gutxi amets egin nuen berarekin.
Girnaldak, zaldi urdinen urrezko iduneria.
Bazterrera eraman eta itaundu zidan:
“Ondo ibili haiz mundu barrena?
Zorterik izan duk?”.
Ezetz esan niola uste dut.
Eta abismora erori baino lehen esan zidan:
“Beti jakin dut maite nauzula”.

3. Ez dakit atzera itzultzea zilegi zaigun,
albo batera lagatako bidegurutzeak
berriz aukeratzeko modurik badugun.
Baina egia da lantzean behin
iraganean sentitutakoa egiazko bilakatzen dela,
amiñi batean bada ere.

4. Ametsetik astebetera
    elkarrekin topo egin genuen kalean.
    Girnaldak, zaldi urdinen urrezko iduneria.
    Ez zuen elkarrizketak
    ametsaren antzik izan.

5. Hainbat urte lehenago bezala,
    irribarre bat gorabehera,
    ez nion ezer esan.

Kirmen Uribe
Bitartean heldu eskutik (2001)

Hiztegia:

girnalda: girlanda
iduneria: (hitz hori ez da Euskaltzaindiaren hiztegian agertzen). Iduneko, lepoko
itaundu: galdetu
lagatako: utzitako